AlbanianMail.co.uk - Themelohet “Mjaft London Club”

Themelohet “Mjaft London Club”

Ralf Gjoni dhe Orsida Gjebrea

Djemtë dhe vajzat energjike të lëvijes Mjaft, tashmë jo vetëm në Tiranë por edhe në Londër. Një grup të rinjsh që jetojnë dhe studiojnë në kryeqytetin britanik, të mbështetur nga lëvizja Mjaft në Tiranë u mblodhën për të formuar “Mjaft London Club”. Sipas organizatorëve “Mjaft London Club” përfaqëson shtrirjen e influencës së organizatës Mjaft, në rrjetin e diasporës shqiptare në Britaninë e Madhe duke përfshirë qytetarët e saj më të përgjegjshëm. Mjaft London Club nuk ka si qëllim mbështetjen apo oponimin e asnjë organizate politike, por ka për qëllim mbështetjen e gjithçkaje që ka si synim zhvillimin ekonomik, kulturor dhe social të shtetasve shqiptarë në Britaninë e Madhe.

Funksionimi
“Klubi i Londrës do të funksionojë si një ndihmues i iniciativave lokale duke u përkujdesur kështu për nevojat specifike dhe trajtimin e problemeve të identifikuara si të tilla nga vetë komuniteti shqiptar në Britaninë e madhe” shprehet Ralf Gjoni koordinatori i krijimit të Mjaft London Club. Duke folur për Albanian Mail, Gjoni thotë se “Ne do të mundohemi të mobilizojmë elementët më të përgatitur dhe më të zellshëm për të ngritur në pah çështjet më emergjente dhe më të rëndësishme që prekin jetën e diasporës këtu. Pra, Mjaft London Club sipas tij, kërkon që të bëhet zëri i komunitetit shqiptar në Britani të Madhe duke qënë se Shqiptarëve këtu u ka munguar një organizëm që të bëjë të ditur shqetesimet apo qoftë dhe arritjet e tyre në një mënyrë efikase” shpjegon Gjoni. Sipas themelusve të Mjaft London Club mësohet se nisma e tyre do të funksionojë si një organizatë e veçantë, me bordin e saj drejtues dhe me fonde të siguruara nga vetë komuniteti dhe organizata të tjera në Britani, por në të njëjtën kohë duke operuar nën strehën e Fondacionit MJAFT dhe duke iu përmbajtur principeve bazë të organizatës-mëme.

Ideja
”Dëshira ishte e përbashkët për të zgjeruar influencën e MJAFT! në Londër” tregon Ralf Gjoni i cili punon si ekspert për çështjet e mbrojtjes. Gjoni është optimist për krijimin e Mjaft London Club, dhe pyetjes tonë nëse kjo nismë e Mjaft do të mbushë vakumin e organizimit të mëtejshëm të komunitetit shqiptar në Londër ai i përgjigjet: “Patjetër, ndryshe nuk do të mobilizoheshim. Diaspora shqiptare në botë dhe më në veçanti në Angli ka hyrë në një fazë tjetër pjekurie që rrjedhimisht kërkon një nivel më të lartë dhe më profesional të angazhimit tonë me komunitetin. Kemi nevojë që imazhi i Shqipërisë të mos përfaqësohet vetëm nëpërmjet filmave apo dokumentarëve të dhënë nepërmjet kanaleve të ndryshme të medias angleze si një vënd që "eksporton" probleme, emigrantë dhe më tepër probleme.

Synimi
Ela Hoxha dhe Orsida Gjebrea dy vajza energjike bashkëthemeluese e Mjaft London Club kanë ide të qarta rreth synimeve që ata kërkojnë të përmbushin me ketë organizim. Ela shprehet se “ Synimi ynë qëndron që të "edukojmë" publikun britanik me gjithçka që është e bukur dhe shqiptare. Një nga objektivat më të përzemërta për Mjaft! London Club do ishte fitimi i konsideratës dhe besimit të komunitetit shqiptar. Shqiptarët kanë nevojë të besojnë që ‘PO!’ ndryshimi pozitiv është i mundshëm edhe për ne; ‘PO!’ është dikush që i dëgjon hallet, problemet e pse jo edhe arritjet tona. Në këtë kuadër, nisma jonë do t'i shërbejë mobilizimit të elementëvë pozitivë të komunitetit për t'a përmirësuar këtë imazh. Ndërsa Orsida Gjebrea që do të mbulojë marëdhëniet me publikun e “Mjaft London Club” mendon, se ka ardhur momenti që diaspora të luajë rolin e një zëdhënësi apo misionari për vendin amë. “Ashtu si gjithë komunitetet e tjera të fuqishme në botë, diaspora shqiptare mund të organizojë qëndra lobingu të forta për të avancuar axhendën kombëtare mbarë-shqiptare në botë” shprehet ajo. Sipas Hoxhës dhe Gjebresë për një vënd si Shqipëria, me një mungesë efikasiteti në politikën e saj të jashtme, diaspora mund të luajë një rol kyç në aktivizimin e çështjeve që prekin shqiptarët si e drejta e votimit të emigrantëve në vëndet e rezidencës, luftimi i imazhit të keq të Shqipërisë, pavarësia e Kosovës, lehtësimi i procedurave të vizave si dhe të drejtat e qytetarëve shqiptarë që jetojnë e punojnë në Perendim e shumë çështje të tjera që do të identifikohen në të ardhmen” shprehen ato.

Aktivitet
Që në ditët e pata të themelimit Mjaft London Club ka mbështetur aktivitetin në London Scool of Economics, tregon Orsida Gjebrea, ku ishte i ftuar për të referuar Albin Kurti. Sipas saj përfshirja e Mjaft London Club në këtë aktivitet, të organizuar nga “Albanian Student Association” dhe “LSE Albanian Association” tregon se ky organizim i Mjaftit për Londër nuk kërkon të punojë vetëm, por të bashkëpunojë me iniciativa të tjera lokale” thekson Gjebrea.

Ky artikull u printua nga www.albanianmail.co.uk të gjitha të drejtat e rezervuara të autorit dhe redaksisë. Materialet e marra nga kjo faqe NUK duhet të botohen diku tjetër pa marrë fillimisht leje në redaksi! Nëse një gjë e tillë ndodh gazetës AlbanianMail i lind e drejta që të ndërrmarri hapa ligjorë pasi kjo gazetë është e rregjistruar pranë organave përkatëse dhe konform legjislacionit anglez.