Autori: Nga: Ardit BALA
Aktualitet

Një grup special policor londinez, i ndihmuar edhe nga policia shqiptare, ka arrestuar dy persona, të cilët akuzohen se kanë kryer një vrasje në Londër. Operacioni i mirorganizuar është kryer në orët e para të mëngjesit të djeshëm, në Peqin të Elbasanit dhe ka përfunduar me arrestimin e Petrit Manhasës dhe Kujtim Celhakës, të akuzuar për vrasjen e një shqiptari. Edhe pse ngjarja e mësipërme ka ndodhur nje vit më parë, në kryeqytetin britanik, grupi policor londinez ka ardhur posaçërisht në Shqipëri, për të realizuar këtë operacion. Grupi i mësipërm policor është ndihmuar nga forcat e Policisë së Elbasanit, por për kapjen e dy të shumëkërkuarve ndërkombëtarë janë angazhuar drejtoria e Policisë Kriminale të Tiranës si dhe Prokuroria e Përgjithshme. Petrit Manhasa dhe Kujtim Celhaka, i njohur ndryshe edhe me emrin Shpëtim kanë përfunduar në prangat e policisë.

Krimi
Kujtim Celhaka dhe Petrit Manhasa do të përballen me drejtësinë, pasi akuzohen për krimin e vrasjes. Sipas burimeve zyrtare të Ministrisë së Rendit Publik, mësohet se rreth 11 vjet më parë, në shtator të vitit 1992, në bashkëpunim me njëri-tjetrin, të arrestuarit kanë vrarë në Angli shtetasin Denis Ceka. Vrasja e këtij të fundit është kryer për motive gjakmarrjeje. Sipas informacioneve të grumbulluara nga policia shqiptare, vëllai i Denis Cekës kishte vrarë vëllanë e Petrit Manhasës. Ky i fundit ka marrë vesh se hasmi i tij ndodhej në Angli dhe ka shfrytëzuar këtë mundësi, për të marrë gjakun. Pikërisht në kryeqytetin anglez, Manhasa ka gjetur mundësinë për t’u hakmarrë për vrasjen e të vëllait, duke vrarë Cekën. Trupi i shqiptarit Denis Ceka është gjetur nga policia londineze, i masakruar barbarisht, vetëm një javë pas vrasjes së tij. Sipas të njëjtave burime zyrtare mësohet se mbi trupin e tij ishin kryer akte kafshërore. Dy autorët e vrasjes e kishin goditur hasmin me 30 thika në trup e më pas i kishin nxjerrë sytë. Identifikimi i shqiptarit të vrarë në Londër është bërë pas hetimeve të kryera si dhe pas ekspertizës, së kryer nga policia londineze.

Kërkimi
Policia londineze kishte shpallur në kërkim ndërkombëtar, prej vitesh, 28- vjeçarin Kujtim Celhaka, banues në Kavajë dhe 32- vjeçarin Petrit Manhasa, banues në Peqin. Sipas njoftimit për shtyp të Ministrisë së Rendit Publik mësohet se dy të shumëkërkuarit për veprën penale të vrasjes së Denis Cekës kanë lëvizur në vende të ndryshme të Evropës. Ata janë kthyer në Shqipëri vetëm pak kohë më parë. Për arrestimin e dy të akuzuarve për vrasjen e tmerrshme, që tronditi kryeqytetin anglez shumë vjet më parë, janë “ngritur në këmbë”të gjitha strukturat qëndrore e lokale të policisë shqiptare. Pas një koordinimi midis Ministrisë së Rendit Publik, Home Office, policisë londineze dhe Prokurorisë së Përgjithshme është bërë i mundur identifikimi i saktë i autorëve të vrasjes si dhe të vendndodhjes aktuale të tyre. Më pas është realizuar edhe operacioni dypalësh, i cili u kurorëzua me kapjen e dy të akuzuarve për vrasjen.

Të akuzuarit do të gjykohen në Shqipëri
Grupi policor londinez, i ardhur në vendin tonë për të realizuar aksionin për kapjen e dy të akuzuarve, ka sjellë me vete dosjen ku ndodhen provat, për vrasjen e ndodhur në vitin 1992 në Londër.Burimet zyrtare të Ministrisë së Rendit Publik bëjnë të ditur se Petrit Manhasa dhe bashkëpunëtori i tij në vrasje, Kujtim Celhaka, do të gjykohen nga drejtësia shqiptare. Grupi hetimor anglez pritet t’u përcjellë të gjitha faktet dhe provat, homologëve të tyre shqiptarë, të cilët do të vazhdojnë më pas proceset gjyqësore, për vrasjen e ndodhur në Angli. Aktualisht, dy personat e arrestuar janë dërguar në mjediset e policisë së Elbasanit, ku edhe mendohet se do të zhvillohet procesi penal ndaj tyre. Vrasja për të cilën ata akuzohen ka ndodhur në Londër, në shtator të vitit 1992, ku është vrarë e më pas masakruar për gjakmarrje Denis Ceka.