Autori: Nga: Lavdrim TERZIU
Investitorët kërkojnë fakte dhe shifra, ministrat shqiptarë tregojnë fajtorët me gisht dhe ofrojnë premtime

15 vite që nga rënia e komunizmit në Shqipëri, ministri i ekonomisë, Genc Ruli ende fajëson regjimin e diktaturës për mungesën e investimeve të huaja në vend. Sipas tij, izolimi komunist i Shqipërisë ka bërë që vendin tonë të mos e njoh investitori i huaj. Ministri Ruli i bëri këto komente gjatë prezantimit të Shqipërisë për biznesin e huaj, në Londër, iniciativë kjo e Bankës Evropiane të Rindërtimit dhe Zhvillimit. Sigurisht që zoti Ruli përmendi edhe arsye të tjera për të justifikuar mungesën e investimeve të huaj në vendin tonë; ndër të tjera, infrastruktura e dobët, mungesat e burimeve te mjaftueshme energjetike, legjislacioni, stabiliteti politik, korrupsioni dhe reputacioni jo i mirë ndërkombëtar i vendit tonë. Si gjithnjë, si të gjithë politikanët shqiptarë në këto vite të gjata tranzicioni, Ruli nuk i kurseu as premtimet. Ai premtoi se një ligj i ri mbi investimet do të kalojë sëshpejti në Kuvend. “Ligji i ri, - tha ai, - do të lehtësojë procedurat e licensimit. Do të hiqet taksa doganore për makineritë e reja të prodhimit që importohen. Do të hiqet TVSH për një periudhë të caktuar kohe për investitorët e rinj. Shteti do të mbulojë shpenzimet e trajnimit të stafit për kompanitë e reja, etj.”. Më pas, ministri Ruli foli për realitetin e ri ekonomik të Shqipërisë. Ai i siguroi të pranishmit se Shqipëria ka njohur një stabilitet makroekonomik gjatë viteve të fundit dhe se nuk ka asnjë risk në këtë drejtim. Ruli e pranoi se Shqipëria është në vendin e fundit në rajon për sa i përket thithjes së investimeve të huaja gjatë vitit që lamë pas.

Arritjet
Sistemi bankar në Shqipëri ka njohur një bum të paparashikuar zhvillimi. Vetëm pak vite më parë, sistemi bankar ishte më i dobëti në Evropë, ndërsa sot është shumë pranë niveleve perëndimore. Kjo u theksua nga disa sipërmarrës dhe ekonomistë të pranishëm në ditën e prezantimit të Shqipërisë. Drejtori i përgjithshëm i Raiffeisen Bank, një ndër bankat e para private në Shqipëri dhe ndër më të fuqishmet në treg, foli me superlativa për mbështetjen që qeveria shqiptare i ofron biznesit të huaj. “Por, gjëja më pozitive në tregun shqiptar është dëshira e madhe e vetë shqiptarëve për progres dhe zhvillim. Ata tashmë besojnë në të ardhmen e vendit të tyre dhe ky mund të jetë celësi i suksesit të këtij vendi”, tha ndër të tjera zoti Steven Grunerud, drejtor i përgjithshm i Raiffeisen Bank. Hapa të mira po bëhen edhe në drejtim të infrastrukturës rrugore në mbarë Shqipërinë. Ky konstatim i disa biznesmenëve pjesëmarrës u pasua nga premtimi i ministrit Genc Ruli se sëshpejti, brenda këtij viti, do të fillojnë punimet për arterien më të rëndësishme rrugore në Shqipëri; autostrada Durrës – Prishtinë. Ministri Ruli nguroi të jepte një datë fillimi, por pas këmbënguljes së disa pjesëmarrësve për të patur një përgjigje më të plotë, ai tha se plani ishte që rruga të fillonte nga punimet brenda vitit dhe të përfundonte brenda dy viteve në vazhdim. Kalim Mitrev, drejtor pranë BERZH për Poloninë, Bullgarinë dhe Shqipërinë premtoi se bordi drejtues i kësaj banke sëshpejti do të vendos për të marrë pjesë në investimin e rrugës Durrës – Kukës. Ministri i ekonomisë, Genc Ruli premtoi ndryshime edhe në sektorët e energjisë dhe atë të sigurimeve ku sipas tij ka probleme të mëdha. “Ne jemi të vendosur të zgjidhim me cdo kusht problemin e energjisë. Ky është prioritet i qeverisë së re.” – tha ai.
Në ditën e prezantimit të Shqipërisë, morën pjesë edhe ministri maqedonas i ekonomisë Fatmir Besimi, diplomatë, investitorë britanikë dhe përfaqësues të biznesit shqiptar. I ftuar në këtë aktivitet, ministri shqiptar i transporteve dhe energjetikës, Lulzim Basha u largua për në Tiranë pak orë përpara se të fillonte seanca e prezanimit.