Autori: Vlora KRASNIQI
Shoqata “Besa” ndan certifikata për nxënësit dhe shpreh mirënjohje për mësuesit vullnetarë, në festën e fundit të vitit shkollor

Nxënësit e klasave shqipe të shoqatës “Besa”, në jug të Londrës u pajisën me certifikata, në përfundim të vitit shkollor. Në një ceremoni të posaçme, drejtuesi i shoqatës “Besa”, Enver Buzuku shprehu mirënjohje të posaçme për vullnetarët e kësaj shoqate të cilët kanë kryer një volum të madh pune për edukimin e brezit të ri të shqiptarëve si dhe për ngritjen dhe promovimin e emrit të kësaj shoqate. Ai ceku punën dhe profesionalizmin e mësueses Teuta Zeka, e cila është edhe themeluese e shkollës shqipe në juglindje të Londrës, qysh ne vitin 2000, si dhe Ylber Ramadanin që është themelues i klubit të vallëzimit. Këtu u fol për rëndësinë e edukimit në gjuhën dhe kulturën shqiptare dhe si ajo do të ndihmoj në integrim në shoqërinë e gjerë britanike. Ky fjalim u përcoll me një valle nga Kosova dhe me një recital të përgatitur nga klasa e tretë. Festimi i përfundimit të vitit shkollor ishte i ndarë në pjesën solemne dhe pasditen e lirë. Programi u fillua me një melodi me klarinetë, të ekzekutuar nga mësuesi i vallëzimit dhe u përcoll me përshëndetjen e mysafirëve, nga udhëheqësja e programit, mësuesja Mimoza Gjini. Pas këngës “O malet e Shqipërisë’, klasa e parë u prezantua me dy këngë të tjera. Pastaj, “vallja e Çobanit” u përcoll me një recital të klasës së dytë të cilët recituan mbi identitetin e tyre. Pastaj u bë prezantimi i certifikatave të nxënësve dhe mirënjohjeve për punën e vullnetarëve Teuta Zeka, Ylber Ramadani, Vjollca Buzoku, Mimoza Gjini, Hanife Gjemaili dhe Myrvete Ramadani. Prezantimin e mirënjohjeve e bënë Fatmir Zeka dhe Kadri Beqiri, anëtarë të komitetit. Vallja e burrave ishte pika e fundit e programit formal, të cilës iu bashkëngjitën edhe mysafirët. Argëtimi vazhdoi në oborrin e shkollës me pije freskuese dhe ushqime nga treva të ndryshme shqiptare. Gjatë kësaj pjese të manifestimit, prindërit dhe anëtarët e shoqatës, patën rastin të njoftohen me njëri tjetrin dhe të shkëmbejnë mendimet dhe idetë e tyre për një të ardhme edhe më të suksesshme të shoqatës “Besa”. Ndërsa prindërit ishin të ngërthyer në biseda dhe diskutime, vullnetarët Kushtrim dhe Kujtim Ibrahimi ishin të angazhuar me argëtimin dhe sigurinë e fëmijëve. Shoqata “Besa” vazhdon t’i dedikohet edukimit të fëmijëve në gjuhën dhe kulturën shqiptare.