Autori: Redaksia

Ruga e Kombit Morinë-Merdare filloi të marrë jetë. Kështu nisën punimet e projektit madhor të autostradës Morinë-Merdarë e cila do të bashkojë Kosovën dhe Shqipërinë, historikisht të ndara. Komuniteti shqiptar që jeton në Mbretërinë e Bashkuar e përjetoi me gëzim këtë fakt. Në familjet e tyre ky gëzim është ndjekur me madhështi dhe madje duke festuar. Rastësisht u gjendëm në shtëpinë e njërit prej intelektualëve nga Puka, që prek kohësh jeton e punon në Mbretërinë e Bashkuar.
Fran Gjini, me sytë e përlotur, teksa rrëkëllen gotën e rakisë na shprehet: “S’ka gëzim më të madh se kjo ditë, vëllezër. Bashkimi tashmë është më natyror, më i prekshëm...”. Dhe pastaj së bashku me mjeshtrin e montimit të satelitëve, Fatosin, që sapo i kishte vendosur satelitin shqiptar ndjek me vëmendje këtë atmosferë festive që nis në Vermicë dhe përhapej gjithandej Globit.
Kryeministri kosovar Hashim Thaçi dhe kryeministri shqiptar Sali Berisha shtypën së bashku butonin e shpërthimit të parë, varg i shpërthimeve që do çajnë malin për të bashkuar Kosovën dhe Shqipërinë. Në Vërmicë të Prizrenit mbërritën krerët kryesorë të shtetit kosovar, si dhe të Qeverisë shqiptare për të marrë pjesë në inagurimin e fillimit të punimeve të autostradës.
Kryeministri Berisha dhe Ministri i Transportit shqiptar Sokol Olldashi ishin në krye të delegacionit shqiptar i cili ishte ftuar në këtë ceremoni. President i Kosovës, Sejdiu tha në fjalën e tij se nis zbatimi i “një ëndrre të kahmoçme” e cila do të ndikojë drejtëpërdrejtë në jetën ekonomike kosovare, por gjithashtu do të mbajë më afër shqiptarët me kosovarët.
“Kjo autostradë shënon përfundimin e ndarjes që na është imponuar për shekuj me radhë”- nënvizoi Sejdiu. Ndërkohë, kryeministri Hashim Thaçi, në fjalën solemne në ceremoninë e inaugurimit të autostradës ka vënë në pah të mirat që do ti sjellë kjo autostradë Kosovës dhe Shqipërisë, duke thënë se ky është projekti më i madh i qeverisë së tij pas pavarësisë.
“Çmimi i autostradës është një shekull vuajtje, përpjekje. Kjo është ditë e madhe, gjithë shqiptarët kanë festë. Po hapim epokën e historisë së re. Sot, qeveria që po udhëheq unë, po fillon projektin më të madh pas pavarësisë. Sot, ëndrrën po e bëjmë realitet” – deklaroi Thaçi. Kjo rrugë sipas tij është kontribut I gjithë heronjve, të gjallëve apo të rënëvë, i të gjithë atyre që dhanë kontributin për ndërtimin e shtetit të Kosovës, sipas tij. Duke e cilësuar si rrugën e bashkimit Thaçi u shpreh se tashmë asgjë nuk i ndan dot më Kosovën dhe Shqipërinë...
Ambasadori amerikan Christofer Dell në fjalën e tij përshëndetëse tha se projekti ishte provë se vendimi i pavarësisë së Kosovës është i drejtë. “Çdokush që vë në pikëpyetje nëse pavarësia është vendim i drejtë atëherë shikon mijëra qytetarët që kanë ardhur sot. Le ta dijnë se sa e rëndësishme është pavarësia e Kosovës”. Dell garantoi se SHBA do të jetë në krah të qeverisë në realizimin e këtij projekti.
Nuk kanë munguar në fjalimet e tyre jo vetëm shpresa për një të ardhme më të mirë në bashkëpunimin midis Shqipërisë dhe më gjerë, por edhe optimizmi për një integrim sa më të shpejtë të Kosovës në strukturat e Bashkimit Evropian. Pjesëmarrja në këtë ceremoni edhe e përfaqësuesve të Maqedonisë dhe të Preshevës, si dhe deklaratat e tyre, treguan dhe një herë se e ardhmja për një bashkërendim të marrëdhënieve është dhe do të jetë pozitive.
Projekti, i cili kushton 700 milionë euro është nënshkruar mes Qeverisë së Kosovës dhe konsorciumit amerikano turk “Bechtel & Enka” pritet te zgjase 3 vjet, dhe pritet të punësohet një numër i konsiderueshëm i kosovarëve. Autostrada parashikohet të jetë e gjerë 28 metra, me 4 shirita qarkullues. Ndërkohë javët e fundit Qeveria e Kosovës i dha zgjidhjen përfundimtare shpronësimeve në zonën që prek rruga me anë të një vendimi për lëvrimin e fondit pasi u përcaktua edhe gjurma që do të ndjëkë rruga. Disa media dhe ekspertë ndërkombëtarë kanë kritikuar qeverinë e Kosovës se po e fillon ndërtimin e rrugës pa siguruar financimet e nevojshme. Duke u lidhur me rrugën Durrës - Kukës, autostrada që po ndërtohet në Kosovë mbulon ciklin e plotë të lëvizjes nga Kosova në Shqipëri.
Ministri i Punëve Publike dhe Transporteve, Sokol Olldashi, në një prononcim për ATSH-në, e konsideroi një ngjarje të shënuar për të gjithë shqiptarët, kudo që janë, fillimin e punimeve për autostradën Morinë-Prizren-Prishtinë-Merdare, që lidh Shqipërinë me Kosovën dhe më gjerë. “Jam i lumtur që mbaroi autostrada në territorin shqiptar dhe sot fillon një autostradë e re, që do të thotë ndërtimi i korridorit të kombit. Suksese Kosovës, suksese qeverisë së Kosovës dhe të gjithë shqiptarëve”, tha ministri Olldashi, i cili ndodhet sot në Vërmicë, Komuna e Zhurrit, rreth 11 kilometra larg kufirit me Shqipërinë, ku dhe do të zhvillohet ceremonia e përurimit të fillimit të punimeve të kësaj autostrade. Sipas zotit Olldashi, ndërtimi i autostradës Morinë-Prizren-Prishtinë-Merdare ka një rëndësi shumë të madhe ekonomike dhe vlefta ekonomike e justifikon ndërtimin e saj si në Kosovë, ashtu dhe në Shqipëri. “14 mijë makina në ditë arriti qarkullimi gjatë verës së kaluar në autostradën Durrës-Morinë, ndërkohë që këtë vit mendohet të arrijë në 16 mijë”, informoi për ATSH-në ministri i Punëve Publike dhe Transporteve të Shqipërisë, ndërsa shtoi se me përfundimin e autostradës së Kosovës ritmet do të jenë edhe më të larta. Kjo autostradë, veç lidhjes me bregdetin dhe daljen në ujërat e Adriatikut, vlerësohet se do të ketë efekte të jashtëzakonshme në plan afatshkurtër dhe afatgjatë për Kosovën, por edhe për rajonin.