Autori: Fatmir Terziu

Dy javëshi që u mbyll shtoi më shumë angazhimet integruese të shqiptarëve në Mbretërinë e Bashkuar. Pas zgjedhjeve të përgjithshme elektorale që pasuan edhe ndryshime në politikën vendase, integrimi shqiptar nisi me angazhimet e shoqatave shqiptare. Ambasadori shqiptar, shkelqesia e Tij, Zef Mazi e ka parë këtë angazhim me vlerat e një integrimi të dukshëm komunitar, ku ai spikat me përkushtimet e tij ndaj këtyre vlerave të Bashkimit dhe integrimit. Në të njëjtën mënyrë edhe Ambasadori i Kosovës Muhamet Hamiti vlerëson këto integrime dhe përkushtime mes Bashkimit te shqiptarëve në aktivitetet e tyre.
Dhjetra aktivistë dhe vullnetarë që operojnë në ndihmë të shoqatës shqiptare “Ardhmëria” në Mbretërinë e Bashkuar janë vënë në lëvizje të përkushtuar për të vënë në jetë një nga parimet kryesore të kësaj shoqate për të ndihmuar integrimin e plotë të shqiptarëve në këtë vend. Në krye të këtyre angazhimeve janë stafi dhe drejtuesit e saj me Drejtorin Lutfi Vata, që me tërë përkushtimin maksimal vazhdon të inkurajojë mjaft aktivistë të moshave dhe profesioneve të ndryshme në një fushatë të plotë integruese.
Kjo shoqatë tashmë e mirënjohur për punën e saj në dobi të komunitetit, gjuhës shqipe, mësimit plotësues në shkollat e saj ku numërohen mbi 600 nxënës, ka shtuar ditët e fundit aktivitetin rregjistrues edhe në dobi të plotësimit të formularëve për përfshirjen e Gjuhës Shqipe në GCSE. Mijëra formularë janë ndarë dhe po përpunohen edhe me ndihmën e aktivistëve të Forumit të Bashkimit të Shoqatave Shqiptare, që drejtohen nga zoti Vata. Formularët janë një nismë e sukseshme pas atyre ndërrmarjeve efikase që shoqatat e përfshira në Forum kanë marrë përsipër.
Në anën tjetër shihet angazhimi intelektual ku spikasin angazhimet e intelektualëve të fushave të ndryshme. Në shoqatën që drejtohet nga Zamira Ruspi, ka patur një përfshirje totale në fushatën zgjedhore britanike, ku vetë zonja Ruspi ishte një nga të zgjedhurat në mesin e Partisë Konservatore, si këshilltare në zonën e Brentit të Londrës Veriore. Doktoresha Ruspi kandidoi me të gjitha gjitha vlerat e saj duke shtuar kështu rolin integrues shqiptar në këtë vend.
Nga ana e Bashkësisë Shqiptare “Faik Konica” që drejtohet nga Talat Pllana, shihet një angazhim në mësimin plotësues dhe sigurimin e fondeve. Kështu operojnë edhe mjaft shoqata të tjera që kanë synim integrimin. “Shpresa Programme” që drejtohet nga Luljet Nuzi, një kujdes të veçantë i ka treguar gruas dhe të rrinjve. Me një tematikë tjetër më të larmishme ka operuar kohët e fundit shoqata “Dituria” me drejtues Ruzhdi Jatën. Shoqata “Sfida” pas konferencës së saj model tashmë konkretizon aktivitetin e saj komunitar në drejtime të planifikuara. Shoqata që drejtohet nga Alketa Gogo vazhdon planifikimet për një fillim të mbarë në procesin edukativ që vjen. Nga “Iliria” në Oksford lajmet vijnë me angazhime konkrete. Nga Mançesteri, zoti Osman Caka, që para disa ditësh përkujtoi mes emocionesh dhe dhimbjes, përvjetorin e rënies së djalit të tij hero në luftën e Kosovës, shprehet për nisma akoma më të bukura kulurore, sportive dhe argëtuese. Nga Birmingami, “MEAF”-i që drejtohet nga Dritan Dema e sheh përkushtimin në angazhime të prekshme duke shtuar punën integruese. Kështu edhe nga Irlanda dhe Skocia, ku bashkëpunëtorët tanë, Ndrek Gjini dhe Sulejman Hasa na sqarojnë angazhimet komunitare. Shoqata që drejtohet nga Rosie Burbuqe Paçarada i është përkushtuar më shumë aktiviteteve të përbashkëta integruese dhe argëtuese me anëtarët e saj.
Pra, shihet se një shenjë më pozitive dhe më premtuese vjen nga këto angazhime. Në mjediset e “Koha” në Martins Court, gazeta “The Albanian” ka festuar 6 vjetorin e saj. Folësit dhe ligjëruesit në takim vlerësuan punën e stafit të saj. Zotërrijntë Emanuel Bajra dhe Petrit Kuçana, sollën mes fakteve disa nga aktivitetet e kësaj gazete. Gazeta ndau dy çmime për persona me angazhime të ndryshme. Njëri nga këto çmime i takoi edhe sportistit shqiptar, Lorik Cana, i cilësuar “Ambasador i përkushtuar i vlerave shqiptare”.
Nga ana tjetër dirigjenti i apasionuar, Bahri Çela ka shtuar bukurinë e dyjavëve që kaluan me një koncert nga studentët që mëson ai. Rasti tjetër i përket madhështisë së vlerave shqiptare. Ishte hera e tretë kjo e para disa ditëve. Ermonela Jaho vinte si një këngëtare me famë botërore mes Londrës. Kishte interpretuar disa role në opera të ndryshme në skenat me emër.
Opera Mbretërore e Londrës dhe ato të Berlinit, Parisit, Lionit, Marsejës, Tuluzës, Romës, Napolit, Veronës, Triestes, Nju Jorkut, Filadelfias, Detroitit, buçasin nga zëri i saj dhe sukseset vijnë njëri pas tjetrit. Pra, Dy yjet e lirikës shqiptare, Ermonela Jaho dhe Saimir Pirgu takohen si protagonistët kryesore të operës “Traviata” në “Royal opera House Covent Garden” të Londrës më 11, 14, 19, 21 e 24 maj 2010.
Komuniteti dhe e ftohta e ekranit
E ftohta e ekranit televiziv është bërë pjesë e përditësisë së Komunitetit shqiptar në Mbretërinë e Bashkuar. Tashmë kjo ‘e ftohtë’ është pjesë edhe e komunitetit shqiptar në Republikën e Irlandës. Gazetari Ndrek Gjini, nuk e fsheh këtë ‘ftohtësi’ teksa na shprehet se tashmë ‘ekrani i televizorit’ është bërë pjesë e pamohueshme e mjaft interesave që lidhen me integrimin dhe përditësinë.
Kështu, komuniteti shqiptar në Britaninë e Madhe dhe në Republikën e Irlandës, edhe pse mbetet një nga komunitetet më të reja në këto vende, vazhdon të luajë një rol të rrëndësishëm në politikën e integrimit. Para disa ditësh mijëra shqiptaro-britanikë iu drejtuan kutive të votimit, ndërsa shqiptarët e vendosur në Irlandë ndoqën me tension problemet e krizës në Greqi, probleme që ndikojnë edhe zonën e tyre të Eurozonës, në të cilën bën pjesë Irlanda. Shqiptarët e Britanisë së Madhe e thanë ligjërisht mendimin e tyre mes votës së fshehtë dhe demokratike. Në këto votime pati edhe të rrinj që votuan për herë të parë, që iu drejtuan kutive në moshën e tyre të rregullt zgjedhore. Jashtë emocioneve të votimeve, mbetën zërat profesionalë të talentëve shqiptarë, Ermonela Jaho dhe Saimir Pirgu, dy yjet e lirikës shqiptare, që u takuan si protagonistët kryesorë të operës “Traviatta” në “Royal Opera House Covent Garden” të Britanisë së Madhe. Opera u vu në skenën angleze në datat 11, 14, 19, 21 dhe 24 maj.
Në anën tjetër, sytë u mbetën nga ekranet që transmetojnë mes satelitit shqip, ku greva e disa deputetëve socialistë është përqëndruar në mes të Tiranës. Vec këtyre fakteve janë edhe shqetësimet për fundvitin e fëmijëve, punësimin dhe mjaft halleve e shqetësimeve të emigrimit. Kështu ditët që pasuan ishin plot emocione dhe tension ekranesh. Në këto tensione votimet britanike duket se shënuan shqetësimin më prekës, pasi aty lidhen edhe fate të jetës dhe të integrimit shqiptar.
Dhe në ditët që pasuan, pas rezultateve të deklaruara të votimit ku konservatorët filluan negociata me liberal demokratët për qeverinë e re, anëtarët e komunitetit shqiptar mbesin si gjithë të tjerët në pritje. Mbesin në pritje të ligjeve të reja, në pritje të angazhimeve e detyrimeve të reja. Kështu anëtarët e komunitetit shqiptar, ndoqën me kujdes bisedimet që vazhduan dhe negociatat për një qeveri koalicioni. Lajmet britanike paraqitën gjithnjë interes dhe reflektime te ndryshme. YouGov nga ana e tij ka dhënë disa statistika të ndryshme. Si pasojë pritja është ende një detyrim i syve nga ekranet televizive. Njerëzit dhe politikanët presin me ankth një zgjidhje. Dy partitë kanë mospajtime të mëdha, përfshirë zëvendësimin apo jo të flotës së nëndetëseve bërthamore si dhe reformimin e kodit zgjedhor. Liberal-demokratët kërkojnë ndryshime në një sistem votimi që ka favorizuar tradicionalisht dy partitë kryesore, konservatorët dhe laburistët. Ata favorizojnë një sistem të praktikuar në shumë vende evropiane, ku partitë marrin vende në Parlament në proporcion me votat që kanë fituar, gjë që eliminon mundësinë e daljes së një partie të vetme në pozitë dominuese. Nga 306 vendet në Dhomën e Komuneve, konservatorëve u mungojnë 18 vende për të siguruar shumicën. Marrëveshja me liberal demokratët ua siguron konservatorëve qeverisjen e vendit për katër vjetët e ardhshëm. Liberal-demokratët kanë në plan ta shfrytëzojnë këtë kartë politike për një numër reformash që ua kanë paraqitur si parakusht konservatorëve. Nik Kleg, udhëheqësi i liberaldemokratëve thotë: “Pa diskutim, rezultatet e zgjedhjeve nënkuptojnë se, politikanët e kanë për detyrë të diskutojnë me njëri-tjetrin, pasi populli ka nevojë për një qeveri të mirë dhe të qendrueshme. Në bisedime do të këmbëngulim për katër përparësitë e mëdha që kemi nënvizuar vazhdimisht, edhe para zhvillimit të zgjedhjeve. Së pari, kërkojmë reformimin e politikave të taksave, e dyta, kërkojmë një strategji të re për arsimin që t’u ofrojë të gjithë fëmijëve fillimin e duhur në jetë, e treta, kërkojmë një strategji të re ekonomike, që të mund të rindërtojmë ekonominë e vendit, dhe së katërti, kërkojmë reforma themelore në sistemin politik të vendit. Pikërisht në këto reforma i bazojmë bisedimet në të ardhmen”. Pavarësisht se çfarë forme merr qeveria e ardhshme e koalicionit, konservatorëve do t’u duhet mbështetja e tre të katërtave të liberal-demokratëve në Parlament.
Nëse kapërcehen mospajtimet dhe arrihet mbështetja e liberal demokratëve, konservatorët do të kishin një numër të mjaftueshëm votash në Parlament për miratimin pa problem të axhendës legjislative. Liam Fox i Partisë Konservatore shprehet optimist se, mund të arrihet një marrëveshje relativisht shpejt: “Shpresoj se do të arrijmë një marrëveshje së shpejti.
Do të ishte shumë problematike nëse të hënën, kur hapen tregjet financiare, ende nuk ka marrë formë një qeveri e qendrueshme për Britaninë. Përjetuam një rënie të ndjeshme të paundit dhe kërcënime ndaj normave të interesit. Politikanët e kanë për detyrë të lënë mënjanë mospajtimet dhe të gjejnë gjuhën e përbashkët për të krijuar një qeveri të qëndrueshme”. Ndërkohë që, vazhdojnë negociatat për koalicionin e ardhshëm qeveritar, Gordon Broun i laburistëve do të vazhdojë të qëndrojë në postin e kryeministrit të vendit që partia e tij e ka mbajtur që në vitin 1997.
Ndërsa komuniteti shqiptar në emigrim i mban sytë mbas të ftohtës së ekranit televiziv, në Shqipëri vapa që sapo ka filluar duket se ka përvijuar një temperaturë të lartë sa politike aq edhe të tensionuar mes palëve të politikës. Ky fakt e bën ende më të tendosur syrin shqiptar ndaj të ftohtës së ekranit, kudo që ndodhet ai, në këtë vend apo edhe në skaje të tjera të emigrimit.